Tuisblad
Werfnavigasie

Kerklike Tydskrifte

As u nog nie ingeteken is op Die Gereformeerde Vroueblad of Die Kerkblad nie, skakel Marina Slabbert by die Administratiewe Buro van ons kerk (018) 294-4264. Of stuur 'n faks na: (018) 293-1042 of 'n E-pos.

Die Kerkblad 24 Oktober 2001
Vroueblad Oktober 2001
Vroueblad November 2001
Die Gereformeerde Vroueblad Weer Bekroon!
Vroueblad Desember 2001
Vroueblad Februarie 2002
Vroueblad Maart 2002
Vroueblad Mei 2002
Vroueblad Junie 2002
Vroueblad Augustus 2002
Vroueblad September 2002
Vroueblad Oktober 2002
Vroueblad November 2002
Vroueblad Desember 2002
Vroueblad Januarie 2003
Vroueblad Maart 2003
Vroueblad April 2003
Vroueblad Mei 2003

1. Die Kerkblad 24 Oktober 2001

Ds. Ben Fourie van Kameeldrift vertel oor sy besoek aan die VSA om die Internasionale Kongres van Gereformeerde Kerke by te woon.
Watter rol het die kerk te speel in die bestryding en voorkoming van armoede? Lees wat dr. Neels Smit hieroor skryf.
Die laaste artikel van dr. Japie Gerber oor die aktuele saak van die gebed van die gelowige.
Die oordenking, redaksionele artikel en 'n insiggewende artikel van Ina Opperman handel oor die Hervorming wat gedurende hierdie maand weer wêreldwyd deur Christene herdenk word.

2. Vroueblad Oktober 2001

'n Nuwe Psalmomdigting is gereed. Kry interessante agtergrondinligting en 'n omskrywing van onder andere die werkwyse wat gevolg is om hierdie Psalmbundel daar te stel. 'n Informatiewe artikel geskryf deur prof. Heilna du Plooy.
Dat Gereformeerde vroue beslis nadink oor hul rol in die kerk is duidelik. Lees 'n hele aantal vroue se sienings in 'n saamgestelde artikel oor hierdie onderwerp.
Dr Paul Kruger wys op die verbasende openheid by Calvyn - juis oor die posisie van die vrou.
Kan 'n mens bewys dat God bestaan? Dr. Chris Malan deel 'n aantal gedagtes met ons lesers.
Die redakteursbrief besin oor 'n aspek van die skokgebeure van 11 September 2001.

3. Vroueblad November 2001

Lees in hierdie nommer van Die Gereformeerde Vroueblad onder andere artikels oor die volgende:

Werkgeleenthede word skaarser en vereis tegelykertyd meer gespesialiseerdheid. Een van die broodwinners moet deesdae meer dikwels in 'n ander stad, in 'n ander provinsie en selfs vir tye in die buiteland gaan werk, terwyl 'n deel van die gesin die tuisfront moet beman. Die verskynsel van pendelhuwelike kom meer en meer voor. Lees wat die slaggate, die moets en die moenies in sulke huweliksverhoudings is.
Ons kinders gaan werk ook dikwels vir 'n tydlank in die buiteland. Lees oor die moontlike negatiewe gevolge asook oor die positiewe faktore wat uit hierdie situasie kan voortspruit - 'n artikel deur iemand wat 'n ruklank Londen gewoon het.
Wat weet u van musiekterapie? Lees 'n kort artikel oor hierdie betreklik nuwe soort terapie.
Vroue lug weer eens hul menings oor hoe hulle hul rol en taak binne die kerk sien.

4. Die Gereformeerde Vroueblad Weer Bekroon!

Ja, die Vroueblad het weer eens 'n wenner opgelewer! Vir 'n derde keer in vier jaar het 'n artikel wat in die Vroueblad gepubliseer is, die CNW-prys vir Afrikaanse Christelike joernalistiek verower! Vir 2001 is die prys toegeken aan Gerrit Coetzee vir sy artikel "WWW.God oftewel: die WonderWeë van God met my Werkloosheid" (Mei 2001). Hiermee wil ons graag hê dat ons lesers moet deel in hierdie vreugde! Sielie Laubscher se "Die keer toe ek in die bos verdwaal het" het in 1998 die prys verower, Mariana Venter se redakteursbrief "Gee ons skoon water om te drink" in 2000 en nou in 2001 Gerrit Coetzee se deurleefde artikel oor werkloosheid. Bo

5. Vroueblad Desember 2001

Ons Kersfeesnommer behoort ons lesers vroeg in Desember te bereik. Lees in hierdie nommer onder andere artikels oor die volgende:

Die hele wêreld wil vrede hê, maar … vrede kan nie bewerkstellig word deur geweld te gebruik nie. (Rina Horn)
Dit wat ouers vir hulle kinders vóórleef, word dikwels vir die kinders in hulle latere lewe 'n rigtingwyser en 'n kosbare nalatenskap. Verskeie lesers skryf oor hierdie soort erfenis wat hulle van 'n pa of 'n ma gekry het.
Armoede bly 'n brandende kwessie in ons land. Lees iets oor aanbiedingswyse van 'n konferensie oor armoede. Maar lees ook oor 'n gemeente se vreugdevolle hartklop - ten spyte van armoede.
Al gewonder hoe jou kind se "werk" in die buiteland kan bydra tot die uitdra van die evangelie en die vestiging van die Koninkryk? Lees dr. Annes Nel se artikel.

Mariana Venter
Redakteur: Die Gereformeerde Vroueblad Bo

6. Vroueblad Februarie 2002

Lees in hierdie nommer onder andere artikels oor die volgende:

Was Jesus Christus nie dalk self die Melgisedek waarvan die Bybel praat nie? (Dr. Chris Malan)
Is dit verkeerd om vir spesifieke sake op die man en op die naam af te bid? Dr. Flip Buys skryf hieroor 'n insiggewende artikel.
Skynbaar alledaagse gebeurtenisse verg ook nadink om die singewing daarvan te probeer vasstel. 'n Aantal leseresse omlyn hul nadinkgedagtes - midde in die roetinetake van ma- en vrouwees.

Mariana Venter
Redakteur: Die Gereformeerde Vroueblad Bo

7. Vroueblad Maart 2002

Lees onder andere oor die volgende in hierdie maand se Vroueblad

Een of ander tyd in 'n mens se lewe word jy gekonfronteer met aspekte van smart, rou en verlies. Uiteenlopende kwelvrae kom dan onwillekeurig in jou gemoed op. Hoe moet ek my hierteenoor instel? Lees die perspektief wat dr. Pieter Bingle hierop stel.
Die vloedramp wat Lydenburg getref het, het Cobie Steyn genoop om weer eens voorraadopname te maak van voornemens om dinge te doen. Ervaar jy ook te dikwels dat jy agterna moet sê "Ek wou nog .."?
Help iemand om homself te help en Christelike verantwoordelikheid is die tema van Isabé Loubser van Famsa se bespreking van gemeenskapsontwikkeling

Mariana Venter
Redakteur: Die Gereformeerde Vroueblad Bo

8. Vroueblad Mei 2002

Lees in hierdie nommer onder andere artikels oor die volgende:

Gedagtes oor ons "gereformeerdheid" van 350 jaar en nadinkvrae en eise wat ook in 2002 aan die Gereformeerde Kerke gestel kan word.
Moet evangelisasie noodwendig 'n "groot" poging wees. Lees dr. Flip Buys se artikel oor die rol wat die gebed van die gelowige in die uitbreiding van die koninkryk kan speel. Lees ook die praktiese voorbeeld en die gevolg van één gelowige se volgehoue kontak (via briewe en die telefoon) met 'n Boeddhis wat nog nie die evangelieboodskap van Christus gehoor het nie.
'n Katkisasiehoupoging met dieselfde groep kinders waarby één ouerpaar vir die afgelope drie jaar betrokkie is (Johann en Franci Dreyer van Pretoria).
En weer eens 'n artikel oor die dag van gedwonge pakket neem en die ontstellende realiteit dat daar nie eens iemand was om jou op jou laaste werkdag "ghoebaai" te sê nie (Gerrit Coetzee vertel die verhaal van Jan van der Merwe).

Mariana Venter
Redakteur: Die Gereformeerde Vroueblad
Bo

9. Vroueblad Junie 2002

Lees in hierdie nommer onder andere artikels oor die volgende:

'n Sewentigjarige lidmaat vra: Sien ons die geheelbeeld altyd raak wanneer ons oor die rolverdeling in die kerk dink? Behoort praktiese oorwegings soos die keuse van voorlesers in klein gemeentetjies nie ook soms die deurslag te gee nie?
Kobie Coetzee vertel van die leefwêreld en rolvervulling van 'n sendingpaar in Botswana: dié van leraar, kategeet, dokter en sieketrooster, maar ook dié van medegelowige wat meehelp om die evangelieboodskap te vestig.
Dr. Chris Malan wei uit oor wat dit beteken dat 'n mens se linkerhand nie moet weet wat jou regterhand doen nie.
Johann Dreyer gee interessante inligting oor hoe 'n mens die leeftydsgroepe van kinders in ag moet neem in die aanbiedingswyse van katkisasie.

Mariana Venter
Redakteur: Die Gereformeerde Vroueblad
Bo

10. Vroueblad Augustus 2002

Lees in hierdie nommer onder andere artikels oor die volgende:

Hoe gaan jy optree as jy die werkgewer is wat 'n werknemer moet ontslaan? Sal jy jou werknemer se situasie empaties kan benader? Besef jy as werknemer altyd watter gevoelens in jou werknemers leef? Lees hoe Gerrit Coetzee "die ander kant van die munt" beskryf.
Is jy oortuig van wat jy glo? Kan jy altyd verdedig wat jy glo? Hoe sou jy reageer op die huidige debat oor die historiese Jesus? Lees enkele uittreksels uit die getuienis van die teologiese dosente van ons kerk.
Al ons dae is nie sonskyndae nie. Meermale is ons moedeloos - word ons selfs depressief. En as ons vashaak by ons seerkrydae, ons letseldae, sien ons nog God se sorgende teenwoordigheid raak? Die redakteursbrief bied een perspektief op hierdie aangeleentheid.
Hierdie nommer het 'n volgende aflewering oor kinders en hul godsdiensbelewing - merkers wat vir ouers en katkisasiehulpkragte van nut kan wees - Johann Dreyer.

Mariana Venter
Redakteur: Die Gereformeerde Vroueblad Bo

11. Vroueblad September 2002

Lees in hierdie nommer onder andere artikels oor die volgende:

In die dagblaaie het ons die afgelope tyd baie gelees oor die Evangelie van Tomas. Kan hierdie geskrif werklik as 'n vyfde evangelie beskou word. Werp die gegewens hierin meer lig op die historiese Jesus? Dr. Frans van der Walt vertel meer oor hierdie geskrif.
Dalk oorweeg jy om 'n tweede keer kansel toe te stap. Dalk wonder jy wat die implikasies van 'n hersaamgestelde gesin gaan wees. Wat is jou kans om so 'n huwelik te laat slaag? Wat is die slaggate van 'n tweede huwelik? Is daar aspekte waarop 'n mens bedag moet wees? Hoe moet my instelling wees as 'n tweede huwelik dalk misluk? Waarin lê die kompensasies as dit slaag? Lees die indrukke van drie lesers wat hierdie paadjie gestap het.
Begeer jy al lankal 'n mooi stuk juweliersware in die vorm van 'n kruis? Lees wat dr. Paul Kruger skryf oor die kruis as simbool en konnotasies wat in die loop van die geskiedenis aan die kruis geheg is.

Mariana Venter
Redakteur: Die Gereformeerde Vroueblad Bo

12. Vroueblad Oktober 2002

Lees in hierdie nommer onder andere artikels oor die volgende:

Heel dikwels probeer ons mense troos met woorde of deur iets bedagsaams te probeer doen. Maar verstaan ons altyd hoe die persoon wat rou voel? Het ons werklik insig in die verskillende fases van die rouproses? Sielie Laubscher brei hieroor uit en gee praktiese wenke hoe om werklik 'n trooster en nie 'n Jobstrooster te wees nie.
Dr. Flip Buys vertel hoe Mukhanyo daadwerklik poog om deur die praktiese opleiding van helpers en pleegma's, die gedagte dat God en die gelowige gemeenskap omgee sigbaar te laat gestalte kry. Lees hoe gepoog word om die baie weeskinders van ons tyd - kinders wat geraak is deur die pandemie van MIV-vigs - te versorg.
Hoe kan 'n sewentig Christene te werk gaan om armoede te verlig? Dit is onder andere wat belig word in 'n nuwe publikasie van BUVTON: Raak betrokke by armoede. 'n Handleiding vir gemeentes en kleingroepe. Lees 'n uittreksel uit hierdie boek.
"Mag Christene vas?" is die vraag wat dr. Chris Malan hierdie maand beantwoord.

Mariana Venter
Redakteur: Die Gereformeerde Vroueblad Bo

13. Vroueblad November 2002

Lees in hierdie nommer onder andere artikels oor die volgende:

Die artikel "Leer om seine fyn waar te neem" werp lig en lewer kommentaar op die proses van luister, 'n aktiwiteit waardeur lidmate vir mekaar "herders" kan wees. Enkele gedagtes oor die seine wat 'n luisteraar of gespreksgenoot behoort te registreer word aangeraak, asook die redes waarom 'n mens soms van die dienste van 'n berader gebruik kan maak. Geskryf deur proff. Cassie Venter en George Lotter. Ook die redakteursbrief benadruk dat begrip en fyn aanvoeling die toon van 'n gesprek kan bepaal.
Uit berigte uit die dagbladpers het dit dalk al duidelik geword wat die voorstanders van die Nuwe Hervorming nie glo nie. Maar wat glo hul wel? Hoe sou hulle "geloofsbelydenis" moontlik daar uitsien? Lees die gedagtes van prof. Amie van Wyk.
'n Opvolgartikel van Sielie Laubscher behandel weer eens praktiese wyses waarop lidmate mekaar in omstandighede van verlies kan bystaan.
In die lig van die populariteit van die Jabes-gebed, lees ook wat dr. Chris Malan skryf oor "Mag 'n mens vir voorspoed bid?"

Mariana Venter
Redakteur: Die Gereformeerde Vroueblad Bo

14. Vroueblad Desember 2002

Lees in hierdie laaste nommer van 2002 onder andere artikels oor die volgende:

As aan jou die taak opgedra word om 'n "skrywer" van Christus se geboortegeskiedenis te wees, op watter feite sou jy klem lê? En sou die feite wat jy selekteer, dalk iets verklap van jou menswees, jou wyse van glo, jou manier van die wêreld sien?
Hoe gemaak as jou man nie glo nie, as jy alleen die verantwoordelikheid het om huisgodsdiens te hou, jou kinders se verbondsopvoeding te behartig? Kan so 'n huwelik slaag?
Die geskiedenis van Rut gesien in die lig van iemand se aanpassing in 'n nuwe omgewing en in nuwe omstandighede.
Waarom word in die Bybel verwys na die ouderdom as 'n sierlike kroon? Lees die interessante voorbeelde van sinvol oud word.

Mariana Venter
Redakteur: Die Gereformeerde Vroueblad Bo

15. Vroueblad Januarie 2003

Lees in hierdie nommer onder andere artikels oor die volgende:

Die manier waarop jy met geld werk, dra "geld-boodskappe" oor aan jou kind. Is jy - wat die hantering van jou finansies betref - 'n rolmodel vir jou kind? Lees wat Susan Kroon hieroor skryf.
Robin Gallaher Branch ontleed die manier waarop Abigajil met Dawid gekommunikeer het en toon oortuigend aan dat oorredende woorde selfs bloedvergieting kan afweer.
Was jy dalk al die slagoffer van inbraak? Dan sal jy die emosies kan deel wat Liesbet Bosua verwoord.
Dr Chris Malan weer, bespreek die vraag of Christus in sy liggaamlike gestalte sal terugkeer met die wederkoms.

Mariana Venter
Redakteur: Die Gereformeerde Vroueblad Bo

16. Vroueblad Maart 2003

Lees in hierdie nommer onder andere artikels oor die volgende:

Miskien het u ook 'n familielid wat stadigaan inskuif onder die newels van Alzheimer se siekte. In hierdie uitgawe vertel 'n leseres hoe hierdie siektetoestand 'n mens se gisters een vir een laat wegraak, maar ook hoe jy elke dag nog kan uitkoop solank jou verstandsfunksie nie algeheel aangetas is nie.
In die laaste artikel oor vrouefigure uit die Bybel wat met hulle woorde oorreed en sodoende rampspoed verhoed, belig Robin Gallaher Branch hierdie maand daardie anonieme, wyse vrou van Abel-Bet-Maäka. Sy was die vrou wat met goed gekose woorde namens haar stad as bemiddelaar opgetree het en burgeroorlog en bloedvergieting voorkom het. Hierdie vrou het uiteindelik die beleg van die stad met haar kommunikasiestrategie beheer en nie Joab met al sy militêre mag nie!
Om te glo, is om reeds vandag seker te wees van God se môre - dit is die kerngedagte van 'n artikel oor die aard van ons geloof.
Suzette Eloff, rektorsvrou van die PU vir CHO, laat ons effens inkyk agter die skerms van die vermaaklikheidswêreld - 'n omgewing wat hard, kompeterend en dikwels sonder emosionele ondersteuning is. Haar raad aan jongmense wat 'n loopbaan in die vermaaklikheidsbedryf beplan: "'n Mens moet 'n sterk selfbeeld hê, goeie ondersteuning hê van jou eie mense, absoluut glo in wat jy doen - en dan moet jy daarvoor gáán en sterk staan."

Mariana Venter
Redakteur: Die Gereformeerde Vroueblad Bo

17. Vroueblad April 2003

Lees in hierdie nommer onder andere artikels oor die volgende:

Die opstandingsgebeure word belig vanuit die perspektief van vroue wat kyk, vroue wat sien en vroue wat sê. Lees hierdie kort artikel deur prof. Cassie Venter.
Die stuk, "Najaarsbesinning", verteenwoordig ook 'n nadink oor die kruis- en opstandingsgebeurtenis.
Drie gesoute onderwyseresse, Martie Venter, André Aucamp en Venita de Kock, omlyn waarom hulle wél skoolhou. In hierdie saamskryfartikel is dit heel duidelik dat onderwys gee sy eise het, maar vir dié wat opvoeders in die ware sin van die woord is, is die kompensasies meer. Uiteindelik word onderwysers én kinders wedersydse opvoeders van mekaar!
Susan Kroon skryf weer 'n uiters prikkelende artikel oor hoe ons kinders en die feit dat hulle (dikwels) nie huishoudelike take afhandel nie, moet hanteer.

Mariana Venter
Redakteur: Die Gereformeerde Vroueblad Bo

18. Vroueblad Mei 2003

Die Mei 2003-uitgawe van Die Gereformeerde Vroueblad verskyn soos gewoonlik weer hierdie maand, op haar plek, op haar tyd! Danksy die uitmuntende werk wat Mariana Venter, ons vorige redakteur, en haar redaksie gedoen het, was die oorneem van hierdie liefdeswerk een groot vreugde. Ek kon slegs die beproefde stappe volg, en voila! - daar het dit gebeur.

Lees gerus die aangrypende artikels in hierdie uitgawe oor die tydelikheid van ons bestaan: Lees oor die regte tyd wat God vir alles bepaal het, en hoe Hy ons bring by begrip daarvan Om te wag op die regte tyd ... Ook oor die Routyd van die Tswana-weduwee, van Pendeltyd wat besinningstyd en voorbereidingstyd word, en van wagtyd, wat berustingstyd word. So het Elke ding sy vaste tyd, tyd waarin ons kan Aanhou bid, Afvlerkvoëltjies kan kosgee en God se sierade versorg.

Besin weer eens of jy nie maar vir die eerste keer of dalk weer moet inteken op Die Gereformeerde Vroueblad nie? (Let wel, dit is die HEEL EERSTE AFRIKAANSE VROUETYDSKRIF in Suid-Afrika en sy is al 57 jaar oud!) Vertel vir jou mede-lidmate in die gemeente, teken in vir 'n vriendin, gee dit vir jou man en kinders om te lees, word 'n Bladbouer en dra finansieel by tot ons groei en voortbestaan, of bid vir ons, en word deel van ons, deur foto's in te stuur, nuuswaardighede, briewe en artikels te skryf, sodat ons kan groei en steeds groter eer aan God opdra, wat ons met soveel wonderlike gawes geseën het.

Marina van Loggerenberg (Redakteur)